Ils 24 da november 2024 vegn la populaziun a votar davart la Midada da la Lescha federala davart l'assicuranza da malsauns (LAMal) (finanziaziun unitara da las prestaziuns).
Curtamain
En Svizra na vegnan las prestaziuns ch'èn cuvridas da l'assicuranza obligatorica da malsauns, betg finanziadas en moda unitara. En cas da tractaments ambulants (en las praticas da medi, tar il terapeut u en l'ospital senza pernottaziun) paja la cassa da malsauns. En cas da tractaments staziunars (en l'ospital cun pernottaziun) surpiglia il chantun almain 55 pertschient dals custs, en cas da prestaziuns da tgira a chasa u en ina chasa da tgira stgars la mesadad dals custs. Il rest surpiglia mintgamai la cassa da malsauns. Quai procura per fauss impuls: Pazientas e pazients vegnan tractads inutilmain savens en moda staziunara, er sch'in tractament ambulant fiss medicinalmain pli raschunaivel e tut en tut pli favuraivel.
Cun ina midada da la Lescha davart l'assicuranza da malsauns ha il parlament decidì, che tut las prestaziuns da l'assicuranza obligatorica da malsauns vegnan finanziadas cuminaivlamain da las cassas da malsauns e dals chantuns e tenor la medema clav da repartiziun. Da nov surpiglian ils chantuns tar tut las prestaziuns almain 26,9 pertschient e las cassas da malsauns maximalmain 73,1 pertschient dals custs. Questa finanziaziun unitara duai reducir fauss impuls sco er promover tractaments ambulants e la collavuraziun da medias, terapeuts, tgirunzas ed apotechers. Perquai ch'ils chantuns e las cassas da malsauns finanzieschan cuminaivlamain tut las prestaziuns, han els in pli grond interess da promover mintgamai quel tractament ch'è medicinalmain il pli raschunaivel ed il pli favuraivel. Quai duai er distgargiar las pajadras ed ils pajaders da premias. Cunter la refurma èsi vegnì fatg in referendum.
Dumonda da votaziun:
Vulais Vus acceptar la midada dals 22 da december 2023 da la Lescha federala davart l'assicuranza da malsauns (LAMal) (finanziaziun unitara da las prestaziuns)?
Recumandaziun dal Cussegl federal e dal parlament
Per il Cussegl federal e per il parlament reducescha la finanziaziun unitara ils fauss impuls che chaschunan l'augment dals custs da sanadad. Ella promova tractaments ambulants e gida ad evitar dimoras inutilas a l'ospital. Uschia vegn meglierada la qualitad dal provediment da sanadad ed i vegnan spargnads custs.
Recumandaziun dal comité da referendum
Per il comité survegnan las cassas da malsauns cun la refurma memia blera controlla sur noss sistem da sanadad. La refurma sforzia la populaziun da pajar premias anc pli autas, ella promovia ina medischina da duas classas ed ella rinforzia la reducziun da las prestaziuns da la tgira a chasa ed en las chasas da tgira.
Ultima midada 27.09.2024
