Ils 24 da november 2024 vegn la populaziun a votar davart il conclus federal dals 29 da settember 2023 davart il pass da cumplettaziun 2023 da las vias naziunalas.
Curtamain
La populaziun e l'economia èn dependentas d'infrastructuras da traffic modernas ed effizientas. Per quest motiv investescha la Confederaziun cuntinuadamain en la rait da viafier e da vias. Perquai ch'il traffic è dapi il 1990 pli che sa dublegià sin las vias naziunalas, datti en differents lieus adina puspè colonnas. En consequenza da quai guntgeschan camiuns ed autos sin vias che mainan tras vitgs e tras quartiers d'abitar. Quest traffic da guntgida reducescha la segirezza e la qualitad da viver da la populaziun. La Confederaziun ed ils chantuns han l'incumbensa da prender mesiras cunter quai. Ina da quellas è quella d'eliminar stretgas en la rait da las vias naziunalas cun agid da cumplettaziuns en tscherts lieus.
Cun il pass da cumplettaziun 2023 vulan il Cussegl federal ed il parlament eliminar las stretgas sin ils suandants sis trajects:
– A1 tranter Le Vengeron e Nyon
– A1 tranter Berna-Wankdorf e Schönbühl
– A1 tranter Schönbühl e Kirchberg
– A2 a Basilea (nov tunnel dal Rain)
– A4 a Schaffusa (2. fora dal tunnel Fäsenstaub)
– A1 a Son Gagl (3. fora dal tunnel Rosenberg)
Per quests projects èn planisads custs da 4,9 milliardas francs. Els vegnan finanziads dal traffic motorisà, quai or dal fond per las vias naziunalas ed il traffic d'aglomeraziun ch'è lià ad in intent. La procedura da permissiun na vegn betg midada: Las persunas, las vischnancas e las federaziuns ch'èn pertutgadas directamain, han la pussaivladad da s'exprimer tar ils singuls projects e d'eventualmain far recurs davant dretgira. Cunter il pass da cumplettaziun 2023 èsi vegnì fatg in referendum. Perquai vuschain nus davart quel.
Dumonda da votaziun:
Vulais Vus acceptar il conclus federal dals 29 da settember 2023 davart il pass da cumplettaziun 2023 da las vias naziunalas?
Recumandaziun dal Cussegl federal e dal parlament
En differents lieus èn las vias naziunalas surchargiadas ed il traffic crescha vinavant. Las consequenzas èn colonnas ed auts custs per la populaziun e per l'economia. Cun sis projects vulan il Cussegl federal ed il parlament eliminar sistematicamain stretgas, per che camiuns ed autos na guntgeschian betg en quartiers d'abitar ed en vitgs.
Recumandaziun dal comité da referendum
Per il comité da referendum è la cumplettaziun planisada bler memia chara e dovra memia bler terren. Ils problems da traffic existents na vegnian betg schliads. Las cumplettaziuns chaschunian dapli traffic, ulteriuras colonnas, ina pli gronda contaminaziun da l'aria, canera e dapli emissiuns da CO2. Dumandada saja ina planisaziun dal traffic cun in bun egl.
Ultima midada 27.09.2024
